നാടകത്തില്‍ അഭിനയിക്കുകയെന്നുള്ളത് സ്ത്രീകള്‍ക്ക് നിഷിധമായിരുന്ന കാലത്ത് വിലക്കുകളെ അതിജീവിച്ച് അഭിനയ രംഗത്ത് എത്തിയ ഒരു നടിയാണ് പ്രശസ്ത നടി ശ്രീമതി ശാന്താദേവി . കോഴിക്കോട് ജില്ലയില്‍ പൊറ്റമ്മലില്‍ തോട്ടത്തില്‍ കണ്ണക്കുറുപ്പ് , കാര്‍ത്യായനിയമ്മ ദമ്പതികളുടെ മകളായി 1927ല്‍ ജനിച്ചു. നാടകത്തില്‍ അഭിനയ ജീവിതം തുടങ്ങിയ ശ്രീമതി ശാന്താദേവിയുടെ ആദ്യ നാടകം 1954ല്‍ അഭിനയിച്ച ` സ്മാരകം ' എന്നതായിരുന്നു. കോഴിക്കോട് ശാന്താദേവി എന്നാണ് അറിയപ്പെട്ടിരുന്നത്. `നീലക്കുയില്‍ ' എന്ന സിനിമയിലെ ` എങ്ങനെ നീ മറക്കും ' എന്നു തുടങ്ങുന്ന വളരെ പോപ്പുലറായ ഗാനം പാടിയ അന്തരിച്ച ശ്രീ കോഴിക്കോട് അബ്ദുള്‍ ഖാദറായിരുന്നു ഭര്‍ത്താവ്. ശ്രീ രാമു കരൃാട്ടിന്റെ `മിന്നാംമിനുങ്ങ് 'എന്ന സിനിമയാണ് ആദ്യ സിനിമ . അവിടന്നങ്ങോട്ട് നിരവധി സിനിമകള്‍. ശ്രീ സത്യന്‍ മുതല്‍ ശ്രീ ജയറാം വരെയുള്ളവരുടെ അമ്മയായി അഭിനയിച്ചിട്ടുണ്ട് . കൂടാതെ , നിരവധി സീരിയലുകളില്‍ അഭിനയിച്ചിട്ടുണ്ട് . നാനൂറിലേറെ സിനിമകളിലഭിനയിച്ച ശ്രീമതി ശാന്താദേവിക്ക് നാടകത്തിനും സിനിമക്കുമായി നിരവധി അവാര്‍ഡുകള്‍ ലഭിച്ചിട്ടുണ്ട് .
1979ല്‍ കേരള ഫിലിം ക്രിട്ടിക്സ് അസോസിയേഷന്‍ പുരസ്കാരം , 1983ല്‍ മികച്ച നാടക നടിക്കുള്ള പുരസ്കാരം , 1992ല്‍ മികച്ച സഹനടിക്കുള്ള ദേശീയ പുരസ്കാരം ,2005ല്‍ സംഗീത നാടക അക്കാഡമിയുടെ പ്രേംജി പുരസ്കാരം ,2007ല്‍ സമഗ്ര സംഭാവനക്കുള്ള കേരള സംഗീത നാടക അക്കാഡമി പുരസ്കാരം ,തുടങ്ങി ചെറുതും വലുതുമായ നിരവധി പുരസ്കാരങ്ങള്‍ ലഭിച്ചിട്ടുണ്ട് . 2010 നവംബര്‍ 20ന് ശ്രീമതി ശാന്താദേവി അന്തരിച്ചു . ആ കലാകാരിയുടെ ഓര്‍മ്മകള്‍ക്കു മുന്‍പില്‍ ആദരാജ്ഞലികള്‍ അര്‍പ്പിക്കുന്നു .
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ