മാനുഷിക മൂല്യങ്ങള്‍ക്ക് പരിഗണന നല്‍കി വിധികള്‍ പ്രഖ്യാപിച്ച ഇന്ത്യയിലെ സുപ്രീം കോടതി ജഡ്ജിയും ദേശീയ ഉപഭോക്തൃ തര്‍ക്ക പരിഹാര കമ്മീഷന്റെ പ്രഥമ പ്രസിഡന്റുമായിരുന്ന ജസ്റ്റിസ് വി. ബാലകൃഷ്ണ ഏറാടി കോഴിക്കോട് ജില്ലയില്‍ 1922 ജൂണ്‍ 19ന് ജനിച്ചു . കോഴിക്കോട് ഉള്ള സാമൂതിരി ഹൈസ്കൂളിലും കോളേജിലും പഠിച്ച അദ്ദേഹം മദ്രാസ് കൃസ്ത്യന്‍ കോളേജില്‍ നിന്ന് സംസ്കൃതത്തില്‍ ബി. എ. ഡിഗ്രിയെടുത്തു . മദ്രാസ് ലോ കോളേജില്‍ നിന്ന് ബി.എല്‍. ഡിഗ്രി പാസ്സായി . മദ്രാസ് ഹൈകോടതിയിലാണ് അഡ്വക്കേറ്റ് ആയി ജോലി ആരംഭിച്ചത് . പിന്നീട് , കേരള ഹൈകോടതിയില്‍ ഗവണ്‍മേന്റ് പ്ലീഡര്‍ ആയി ജോലിചെയ്ത അദ്ദേഹം ,1967ല്‍ കേരള ഹൈകോടതിയില്‍ അഡീഷണല്‍ ജഡ്ജിയായി. 1980ല്‍ കേരള ഹൈകോടതിയില്‍ ചീഫ് ജസ്റ്റിസ് ആയ അദ്ദേഹം ഒരു വര്‍ഷം കഴിഞ്ഞപ്പോള്‍ സുപ്രീം കോടതി ജഡ്ജിയായി നിയമിതനായി . 1987ല്‍ വിരമിച്ച ശേഷം ,1988ല്‍ ദേശീയ ഉപഭോക്തൃ കോടതിയില്‍ പ്രസിഡന്റ് ആയി സേവനം ചെയ്ത അദ്ദേഹം, 1997ല്‍ അതില്‍നിന്ന് വിരമിച്ചു. 1999ല്‍ അദ്ദേഹം ദേശീയ കമ്പനി നിയമ ട്രൈബൂണല്‍ ചെയര്‍മാന്‍ ആയി നിയമിതനായി . രവി- ബയാസ് നദീജല തര്‍ക്ക ട്രൈബൂണല്‍ ചെയര്‍മാന്‍ ആയിരുന്നിട്ടുണ്ട്.
കലാ സാംസ്കാരിക , സാമൂഹ്യ സംഘടനകളില്‍ സജീവമായിരുന്നു ജസ്റ്റിസ് ബാലകൃഷ്ണ ഏറാടി . ഡല്‍ഹിയിലെ കഥകളിക്കു വേണ്ടിയുള്ള അന്തര്‍ദേശീയ സെന്ററിന്റെ പ്രസിഡന്റ് ആയിരുന്നു . ` സ്വരലയ' എന്ന കര്‍ണ്ണാടക സംഗീത സൊസൈറ്റി ഓഫ് ഇന്ത്യയുടെ പ്രസിഡന്റ് ആയിരുന്നു . നിരവധി അവാര്‍ഡുകള്‍ നേടിയിട്ടുണ്ട് . രാജീവ് ഗാന്ധി എക്സലന്‍സ് അവാര്‍ഡ് , നാഷണല്‍ സിറ്റിസണ്‍ഷിപ്പ് അവാര്‍ഡ് , ശിരോമണി അവാര്‍ഡ് , നാഷണല്‍ പ്രസ് ഓഫ് ഇന്ത്യ ഗോള്‍ഡണ്‍ ജൂബിലി അവാര്‍ഡ് തുടങ്ങിയവ അവയില്‍ ചിലതാണ് . 2010 ഡിസംബര്‍ 30ന് അദ്ദേഹം അന്തരിച്ചു . അദ്ദേഹത്തിന്റെ ഓര്‍മ്മകള്‍ക്കു മുന്‍പില്‍ ആദരാജ്ഞലികള്‍ അര്‍പ്പിക്കുന്നു .
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ