``Why were you searching for me? Did you not know that I must be in my Father 's house?''. (Luke. 2- 49.)ബാലനായ യേശു താന്‍ ദൈവപുത്രനാണെന്ന് ആദ്യമായി സ്വയം വെളിപ്പെടുത്തുന്ന സംഭവം വി.ബൈബിളില്‍, സുവിശേഷത്തില്‍ നാല് സുവിശേഷകരില്‍ ഒരാളായ വി. ലൂക്ക മാത്രമേ രേഖപ്പെടുത്തിയിട്ടുള്ളു. ബാലനായ യേശുവിനേയും കൊണ്ട് മാതാപിതാക്കള്‍ ജറുസലെം ദേവാലയത്തിലേക്ക് പെസഹാ തിരുനാളിന് പോകുന്നതാണ് സന്ദര്‍ഭം. തിരുനാളില്‍ പങ്കെടുത്ത് തിരിച്ച് പോരുമ്പോള്‍ , മാതാപിതാക്കള്‍ നോക്കുമ്പോള്‍ ,യേശുവിനെ കാണുന്നില്ല . ബന്ധുക്കളുടെ കൂടെ കാണുമെന്നാണ് അവര്‍ വിചാരിച്ചത്. തിരിച്ച് ചെന്ന് നോക്കുമ്പോള്‍ യേശു ജറൂസലെം ദേവാലയത്തില്‍ ഇരുന്ന് വേദശാസ്ത്രികളും പണ്ഠിതരുമായി ദൈവ വചനത്തെ കുറിച്ച് സംസാരിക്കുകയും തര്‍ക്കിക്കുകയും ചെയ്യുന്നതാണ് കണ്ടത്. കണ്ട മാത്രയില്‍ ,അമ്മ മറിയം , യേശുവിനോട് ചോദിച്ചു. മകനെ നീ എന്താ ഞങ്ങളോട് ഇങ്ങനെ ചെയ്തത്?. നിന്റെ പിതവും ഞാനും നിന്നെ കാണാതെ എത്ര വിഷമിച്ചുവെന്നറിയാമൊ?. അപ്പോള്‍ വെറും 12 വയസ്സുള്ള ബാലനായ യേശു ചോദിക്കുകയാണ്, `` നിങ്ങള്‍ എന്തിനാണ് എന്നെ അന്വേഷിച്ചത്? ,ഞാന്‍ എന്റെ പിതാവിന്റെ ഭവനത്തില്‍ ആയിരിക്കേണ്ടതാണ് എന്ന് അങ്ങേക്കറിയില്ലേ?.എന്ന്.
മറ്റ് മൂന്ന് സുവിശേഷകന്മാര്‍ രേഖപ്പെടുത്തിയിട്ടില്ലാത്ത പല സംഭവങ്ങളും വി. ലൂക്ക രേഖപ്പെടുത്തിയിരിക്കുന്നതായി സുവിശേഷത്തില്‍ നോക്കിയാല്‍ കാണാം . നല്ല സമരിയക്കാരന്റെ ഉപമ, ധൂര്‍ത്ത പുത്രന്റെ ഉപമ എന്നിവ അവയില്‍ ചിലതാണ്. ലൂക്ക സാമൂഹ്യ നീതിയുടേയും പാവപ്പെട്ടവരുടേയും സുവിശേഷകനായി അറിയപ്പെടുന്നു .കരുണയുടെ സുവിശേഷകന്‍ എന്നും ഇദ്ദേഹം അറിയപ്പെടുന്നുണ്ട്. വി.ബൈബിളിലെ , സുവിശേഷത്തിലെ മൂന്നാമത്തെ സുവിശേഷവും അപ്പസ്തോല പ്രവര്‍ത്തനവും[ ശ്ലീഹന്മാരുടെ നടപടി ] വി. ലൂക്ക എഴുതിയതാണ് . സിറിയയിലെ അന്ത്യോക്യയിലാണ് അദ്ദേഹം ജനിച്ചത് . ഒരു ഭിഷഗ്വരന്‍ [ഡോക്ടര്‍ ] ആയിരുന്നു അദ്ദേഹം . സെന്റ് പോളിന്റെ അടുത്ത അനുയായി ആയിരുന്നു . ഒരു ഡോക്ടര്‍ ആയതിനാലാവാം, ഒരുപക്ഷെ, അദ്ദേഹത്തിന്റെ സുവിശേഷ രചനകളില്‍ രോഗ ശാന്തിക്ക് വളരെ പ്രാധാന്യം കൊടുത്തിരിക്കുന്നതായി കാണാം .
സര്‍വ്വ മനുഷ്യരുടേയും രക്ഷകനായി യേശുവിനെ സുവിശേഷത്തില്‍ വി. ലൂക്ക അവതരിപ്പിക്കുന്നു. അദ്ദേഹം ഒരു ചിത്രകാരന്‍ ആയിരുന്നതായും വിശ്വസിക്കപ്പെടുന്നു . ഉണ്ണിയെ കൈയിലേന്തിയ ദൈവമാതാവിന്റെ [നിത്യ സഹായ മാതാവിന്റെ ] അത്ഭുത ചിത്രം വി.ലൂക്ക വരച്ചതാണെന്ന് കരുതപ്പെടുന്നു . ഡോക്ടര്‍മാരുടേയും, സര്‍ജന്‍മാരുടേയും, ചിത്രകാരന്മാരുടേയും മദ്ധ്യസ്ഥനാണ് വി. ലൂക്ക . വിശുദ്ധന്റെ മദ്ധ്യസ്ഥ സഹായം തേടി പ്രാര്‍ത്ഥിക്കുന്നവര്‍ക്ക് നിരവധി അനുഗ്രഹങ്ങള്‍ ലഭിക്കുന്നതായി അനുഭവസ്ഥര്‍ സാക്ഷ്യപ്പെടുത്തുന്നു. ഒരു രക്തസാക്ഷിയായി ആണ് അദ്ദേഹം മരിച്ചതെന്നും ,അല്ലയെന്നൂം ,വിശ്വസിക്കപ്പെടുന്നു. ഒക്ടോബര്‍ 18ന് ആണ് ഒാര്‍മ്മ തിരുനാള്‍ .
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ