`` പോകുന്നു ഞാന്‍ എന്‍ വത്സലരേ
അന്തിമ യാത്ര പറഞ്ഞിടുന്നു
കേഴേണ്ട കണ്ണീര്‍ ചൊരിഞ്ഞിടേണ്ട
സ്വര്‍ഗ്ഗം പൂകുവാന്‍ പോകുന്നു ഞാന്‍
ചെയ്യേണ്ട ജോലികള്‍ ചെയ്തു തീര്‍ന്നു
ഞാന്‍ എന്‍ പ്രയാണം പൂര്‍ത്തിയാക്കി
നിങ്ങളെന്‍ മാര്‍ഗ്ഗത്തില്‍ പിന്‍തുടര്‍ന്നാല്‍
സൗഭാഗ്യമെങ്ങും തെളിഞ്ഞു നില്‍ക്കും
കന്യാമറിയത്തിന്‍ നിര്‍മ്മലരാം
മക്കളായ് ഭൂമിയില്‍ ജീവിക്കുവിന്‍
ആപത്തില്‍ വീഴാതെ സര്‍വ്വേശ്വരന്‍
സന്തതം നിങ്ങളെ കാത്തുകൊള്ളും ''
` കര്‍മ്മയോഗി ' എന്ന സിനിമക്കു വേണ്ടി ഫാ. ആബേല്‍ രചിച്ച് കെ.കെ.ആന്റണി സംഗീത സംവിധാനം ചെയ്ത് ഗാനഗന്ധര്‍വ്വന്‍ കെ.ജെ.യേശുദാസ് പാടിയ ഈ ഗാനം ആര്‍ക്കാണ് മറക്കാന്‍ കഴിയുക? കലോപാസനക്കു വേണ്ടി ജീവിതം മാറ്റിവെച്ച ഫാ. ആബേല്‍ പരിയാപ്പുറം CMI എന്ന ആബേല്‍ അച്ചന്‍ മൂലക്കുളം ഗ്രാമത്തില്‍ ശ്രീ. മാത്തന്‍ വൈദ്യന്റേയും ശ്രീമതി ഏല്യാമ്മയുടേയും മകനായി 1920 ജനുവരി 19ന് ജനിച്ചു. മാത്യു എന്നായിരുന്നു വൈദികന്‍ ആകുന്നതിന് മുന്‍പ് ഉണ്ടായിരുന്ന പേര്. 1951ല്‍ വൈദികനായി. 1952ല്‍ `ദീപിക ' ദിനപത്രത്തില്‍ പത്രപ്രവര്‍ത്തകനായി. അടുത്ത വര്‍ഷം റോമില്‍ പോവുകയും ജേര്‍ണലിസത്തിലും പൊളിറ്റിക്കല്‍ സയന്‍സിലും ഡോക്ടറേറ്റ് എടുക്കുകയും ചെയ്തു . തിരിച്ചുവന്ന അദ്ദേഹം 1961വരെ `ദീപിക 'യില്‍ അസി. മാനേജിംഗ് ഡയറക്ടര്‍ ആയി ജോലി നോക്കി. ദേവഗിരി സെന്റ് ജോസഫ്സ് കോളേജില്‍ പ്രൊഫസര്‍ ആയിരുന്നിട്ടുണ്ട്.
1963ല്‍, യുവ കലാകാരന്മാരെ പരിശീലിപ്പിക്കുന്നതിനായി എറണാകുളം ആസ്ഥാനമായി ` കലാഭവന്‍ ' തുടങ്ങി. കൃസ്തീയ ഭക്തി ഗാന ശാഖക്ക് നിസ്തുലമായ സംഭാവനകള്‍ നല്‍കിയ ആളാണ് അദ്ദേഹം . നിരവധി ഗാനങ്ങളുടെ രചയിതാവായിരുന്നു . ശബ്ദാനുകരണ കലയെ `മിമിക്സ് പരേഡ് ' എന്ന തലത്തിലേക്ക് ഉയര്‍ത്തിയ ആളായിരുന്നു അദ്ദേഹം . പ്രശസ്തരായ സിനിമാ നടന്മാരായ ജയറാം, സിദ്ദിഖ്, അന്തരിച്ച എന്‍.എഫ്. വര്‍ഗ്ഗീസ്, കലാഭവന്‍ മണി തുടങ്ങി നൂറുകണക്കിന് പ്രതിഭകള്‍ `കലാഭവന്‍ ' എന്ന പരിശീലന കളരിയിലൂടെ പഠിച്ചിറങ്ങിയവരാണ്. തിരുമുടിക്കുന്നുകാരനായ, `അങ്കമാലി നാടകനിലയ'ത്തിന്റെ മുഖ്യ സംഘാടകനും നാടക നടനുമായിരുന്ന അന്തരിച്ച ഒൗസേപ്പച്ചന്‍ [ ഔസേപ്പച്ചന്‍ കണ്ടംകുളത്തി ] കലാഭവനില്‍ പഠിച്ചിട്ടുണ്ട്.
2001 ഒക്ടോബര്‍ 26 ന് ഫാ. ആബേല്‍ [ആബേലച്ചല്‍ ]എന്ന കലോപാസകന്‍ ഓര്‍മ്മയായി . ഈശ്വരപൂജയും മാനവസേവയും കലോപാസനയിലൂടെ നിര്‍വ്വഹിക്കാമെന്ന് ലോകത്തെ കാട്ടികൊട്ടുത്ത ആ മഹാ പ്രതിഭയുടെ ഓര്‍മ്മകള്‍ക്കു മുന്‍പില്‍ ആദരാജ്ഞലികള്‍ അര്‍പ്പിക്കുന്നു .
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ